D'r Büttel Bobby - scharf beobachtet von der Stadtgarde. Fotos: GeigerMemmingen (rad). Der Fischertag in Memmingen wird traditionell vom Memminger Büttel mit seinem arg individuellen Fischerspruch eröffnet. Manchmal ironisch, bisweilen auch heftig, aber aber niemals zynisch. Dafür aber ziemlich launisch - so wie 'd Memming'r halt send. Wenn 'se d' Wahrheit sagat - so wie mit'm Brunna, der au a Wasser hat.
Der nuie Brunna isch guat für's Forellenräuchern - des tät au die Kräha verjagn. Sagt d'r Hauptmann von der Stadtgarde.
Hier seine Rede zum Fischertag 2014
1) Begrüßung:
a) Isch d’r Fischerkönig Dieter I., der Waldgeist do ?
Dia wichtigste Person – komm her ond zoig dih dei’m Volk !
(bekommt ein Metermaß mit 16 cm/ 16 Stunden bis zum Lochtritt )
b) Begrüßung vom Stadtbachfischer und OB Dr. Ivo Holzinger
c) Dia Vorstandschaft vom Fischertagsverein – ohne dia ging nix
d) den Ehragardischt Fritz Bochtler ond den nuia Ehrabürger Josef Miller
2) D’r alte Bürgermoischt’r ond d’r nuie Stadtrat hand auf Antrag des Fischer-
tagvereins einstimmig beschlossa, daß morga, am Samstig den 26. Juli 2014
der Fischertag stattfindet.
3) Alle Fischer aufpassa :
Dia Fischer sammlat sich wia jed‘s Joahr ab ½ Siebene im Hof vo d’r Realschual.
Noach Siebene gibt’s koin Stempel meh, ond ohne Stempel derfsch it fischa !
a) wega dera Baustelle Fuaßgängerzone, ändert sich am Samstigmorga der
Zuagweg - d’Stadtgarde lauft ja voraus, do ka nix schieaf gau:
S’Westertor rei – d‘ Herrastroaß nom übern Roßmarkt – am Klösterle
vorbei ( do muaß ma hintereinander laufa) zom Schrannaplatz.
Des Joahr goaht d’r Zug an d’r Realschual früher weg, damits it wieder so
an Zeitdruck wia letztes Joahr gibt.
b) Wenn d’r Oberfischer Jürgen Kolb mit sei‘m Fischerspruch fertig isch,
dann könnat ihr an eure Plätz am Bach renna.
Wer vorher am Bach hockat wird von d’r Bachaufsicht aufg’schrieba ond
derf nächstes Joahr it fischa - wer vor dem Böller neijuckt, ka glei sein
Bära verkaufa !
d) Denkat au des Joahr dra – 7 Liter Wasser pro Forell im Kübel – wega dem
Tierschutz – letztes Joahr hoat des guat klappt – a‘ Lob an alle Fischer
e) D‘r Forellapreis isch gleich blieba: wenn deine Fisch abgibsch, kriagsch 3 € 50Cent
fürs Kilo.
f) Sott irgendwo im Bach a Fremdkörper ohne Bära oder mit Transparentla
auftaucha – it provoziera lau ond oifach IGNORIERA !
Des isch füar onsere „Freind“ dia gröschte Stroaf !
g) No was Nuies – der Fischerobad am Samstig findet auf dem Marktplatz statt.
4) Umbenennung von Strassen:
a) Ich fend des scho komisch, daß ma noach 70 Joahr drauf kommt, daß a Stroaß
falsch benannt isch – ma könnt fascht moina dem Stadtrat isch es manchmol
langweilig - ond vo dene Koschta füar dia Anlieger, do schwätzt koiner.
Was ma jetzt erreicht hoat isch, daß auf oimol alle über den Wernherr v. Braun
schwätzat, den ma eigentlich vergessa wollt.
b) Wenn jetzt dia Nichtraucher sich beschwerat, dann muaß ma den „Revalweg“ au
umbenna – wega gesundheitsschädlicher Werbung.
c) noach dem Motto: „Geh – Froh „ durch die Stroassa der Stadt, könnt ma
sicherlich no viel ändera – vielleicht au dia „Pfaffagass“, wenn sich a Pfarrer
mol beschwera dät. Oder wenn ma dia Widdergass‘ wieder aufmacht, müsst dia
in Schmuse – oder Brunzgässle umtauft wera.
5) Fußgänerzone:
Zur Baustelle in der Fuaßgängerzone sag ich nix – Wenn zom Ei’kaufa gosch, sott’sch
nach wia vor dia Bergschuah a’zieha ond dia Wanderstöck mitnemma, sonscht kriagsch a
Problem – aber des daurat nomma lang – sait ma…..
6) Krähen:
Dia Stadt Kempta hoat von der Stadtgarde dia nui Stadt-Drohne vom letzta Joahr
erworba. In der MZ stand a‘ großer Bericht: Drohne verscheucht Krähen – fernge-
gesteuertes Flugmodell im Einsatz gegen lärmende Krähen im Stadtpark – des hoat bei
dene in Kempta wunderbar funktioniert – alle Kräha send meh in Memminga !
7) Lob :
Dia Verantwortliche für „Memmingen blüht“ und dem „Stadtfescht am
Westertorplatz“ hand wieder a guate Arbeit g’macht. Des verdient scho au mol an
Beifall ond a Dankeschön!
8) Stadtrat:
a. Bei d’r Stadtratswahl send desmol 17 Nuie ins Rathaus ei‘zoga - – ond koiner isch
über 70ig – des haut den Altersdurchschnitt im Rat jetzt ganz sche ra‘.
b. Im Städtle gibt’s viele interessante Stadtführunga , z.B – Wetterfahna ond
Wirtschftsausleger – demnächst gibt’s a‘ Sonder-Führung füar alle nuie Stadträt‘.
Do wiard dann an hand vo dene Wetterfahna erklärt, wia ma feststellt woher der
Wind weht ond wia ma sich dreha muaß, daß am wenigsta Widerstand entstoaht.
c. A‘ Leser von d’r MZ hoat vorg‘schlaga, daß ma noach jeder Abstimmung über a‘
Objekt a Foto macha sott, wo auf oiner Seite dia Ja-Sager ond auf d’r andra Seite
dia Noi-Sager standat – der Bildband wär dann a große Hilf‘ füar dia nexte Wahl.
Weil hendanoach woiß wieder koiner von irgendwas.
Bei d’r Stadtgarde gibt’s ja au was Nui’s: Vorstellung der zwei neuen Stadtgardisten durch den Hauptmann Werner Eberhardt!
9. Ich hau no a Kloinigkeit vergessa zom saga:
Am Weinmarkt gibt’s so a „DING“, des goaht mir oifach it aus’m Grind.
Des nuie Ding am Weinmarkt isch geschichtlich füar onser Heimatstädtle sicherlich
sehr wichtig. Wo d’r OB an d’r Einweihung vo‘ dem „Ding“ g’sait hoat: Wasser marsch -
do hätt ich vor Lacha fascht in d’Hosa brunzt. Z’erscht kommt nix ond dann hoat ma
g’moint des sei Weihrauch was do raus kommt.
Aber dann send dia Dischkussiona erscht so richtig los ganga.
Wia ma in d’r MZ lesa ka, stellat sich die Memminger Bürger scho a paar Froga:
1. Warum hoißt des Ding „Brunna“ ? 2. Isch des der richtige Standort ? ond
3. Isch des „Ding“ künstlerisch und funktionell ausgereift ?
Zur künstlerischa Gestaltung vo dem „Ding“ wird noachher dia Stadtgarde no
ebbas zom Saga hau !
Ich hau mih scho g’froagt, ob bei der Abstimmung im Stadtrat vielleicht a Stromausfall füar dia Lautsprecheranlage war, sodaß it alle mitkriagt hand für was se nicka sollat.
Wenn a Bürger im Städtle ebbas am Haus ändera will, gibt’s a mords G’schieß, ond do am Weinmarkt wird des „Ding“ oifach vor dia alte Fassada na g’stellt. Ih verstand des it !!
Dia Stadtgarde bietet ab sofort an nuia Service a‘ :
1. Eine Begleitung mit Schirm beim Queren des Weinmarktes bei Westwind.
2. Noachdem ma ja dia kloine Schrift am Sockel vom „Ding“ ohne Vergrößerungsglas it
lesa ka, findat 1 x stündlich a‘ Vorlesung der 12 Artikel statt – koschtalos ! In alle
wichtige Sproacha: d’Stadtgarde lernt verstärkt württembergisch…..
3. Vielleicht sott ma so a Säule aufstella, wo ma 1.-Euro nei schmeißt ond dann mit ma
Kopfhörer die ganz G‘schicht a‘höra ka‘, so wia in Alcatras.
Mit dem Geld könnt ma dia Folgekosta fürs „Ding“ zahla.
4. D’r Stadtgardist Schmidhofer – der oinzig schwindelfreie in dem Haufa - macht grad an
Kurs als Säulanentkalker – do hoat er dann s’ganz Joahr Arbeit ond in Kaufbeura ka er au
no aushelfa. Dia hand au so a „DING“ vom gleicha Künstler, wo Brunna hoißt ond koi
Wasser lauft. D’r Stadtrat macht des Joahr sein Betriebsausflug noach Kaufbeura, damit
er sieht wia so a „DING“ noach a paar Joahr auslugat und was für Folgekosta entstandat.
5. Noachdem ma jetzt ja in Memminga kurzfristig Stroaßa umbenennt, stell ich den An-
trag, daß des „Ding“ am Weinmarkt au bald an andera Namenszusatz kriagt. Statt
„BRUNNEN „ sott des vielleicht MUFI-Turm hoißa, (Mulifunktionsturm) , ma könnt so a
moderne Webcam oba nauf macha – ond den Verkehr ond dia Wildparker am Wein-
markt überwacha, solang der it autofrei isch .
6. Sott ma des „Ding“ mol entsorga müssa, ma könnt des dem OB als Abschiedsg‘schenk
in Gata stella – dann wärat bei Westwind dia Blumabeet immer feucht.
So, des wär jetzt des Wichtigste – wer it all’s verstanda hoat, ka ja om Viertel noch Siebene an da Schrannaplatz nomm komma.
Ich wünsch uih alle an schöna und erfolgreicha Fischertag 2014. Uir Büttel - Bobby
Mit freundlichem Gruß – d’r Büttel