Memmingen (rad). Es ist gute Tradition, dass der Büttel den Fischertag mit lockeren Sprüchen zum Stadtgeschehen einläutet. Außerdem gibt's heuer gleich zwei Jubiläen zu feiern - den Fischertag in der Form, wie wir ihn kennen, gibt's seit 125 Jahren, der Stadtgarde feiert ihr 75-Jähriges.
Und des hott d'r Büttel g'sait:
Liabe Leit, liabe Gäschd horchat zua!
Bürgermoischter ond Raut der freia Reichsstadt Memmingen hot bschlossa, dass Morga, am 26. Juli 2025, der Memminger Fischertag stattfended!
Es ischd ein Jubiläumsfischerdag! Weil es den in dera Form genau seit 125 Joahr geit!
Der Fischerzug, goht morga meh om viertel noch Siemne vo dr alta Realschual zum Schrannaplatz! Wichtig: ma trifft sich id in der Schlossergaß! Onser Oberbürgermoischder hott dia Baustell in der Zangmeisterstroas selber aufgräumet. Jetzt kenn mer doch alle do durchlatscha!
Ond au der Oberfischer schwätzt sein Fischerspruch om dia Zeit! (ER hott extra zwecks dem Jubiläum 125 kloine Versla gmacht! Brengat ´r halt en Stuahl zom nahhocka mit. Dr Spruch kennt a wenga länger gau!)
Es ischd aber trotzdem grundsätzlich verbota vor oder während dem Fischerspruch mit seim Bära an da Stadtbach nahz´hockad!
Wenn um 8te da Böller kracht derfet alle Fischer ond au dia vier oder fünf Fischerinnen in da Stadtbach neijucka!
Diesbezüglich hott der Thorschden Burgbergbier zu mir gsait: I soll saga, dass ma noach em Böller aus Höflichkeitsgründen zuerst die Fraua neijucka losst! Haltet Eich verbindlich dra! Ma erkennt die Fischerinnen an de feschdliche Dirndl!
Ma hot da Forella- und Forellinnenpreis fiar da Samstig meh auf vier Euro pro Kilo feschdglegt!
Der wo abr meh verlangt, wird am Marktplatz von den Memminger Scharfrichtenden an d´ Ohra aufghängt!
Memminga, 25. Juli fünfazwanzg
Dr Oberbürgermoischder
i.A. dr Büttel
So, liabe Leit: Nochdem dr kloine Jan (abgekürzt KI) scho übr zwoi Joahr an der Macht isch,-soll I vo eahm noch a baar Informationa bekannt geaba:
Er hott zua mir gsait, dass es besser isch, wenn I d ´Bevölkerung scho vorab informier!
Des hott fiard Bevölkerung au en gewaltiga Vortoil: Aus de Stadtratssitzunga ka i berichta, dass er fast alz dreimol verzällat. Ich glaub. Er moint, dass dia Stadträt des aufs erschde Mol id kapierat ond drom wiederholt er sich laufend.
I mach a mol a Beispiel:
Also: do stellt zuerschd a Verwaltungsvorträger ebes vor, was ma abstemma sott: z. B. dass ma dem FCM nohmol 2 Milliona schenkt! (des war jetzt a Späßle meinerseits….soll bloß a Beispiel sei…..entspricht nicht der Realität!!! Id aufrega!) dann ergreift glei drnoach der KI des Wort und sagt:
Also liebe Kolleginnen ond Kollegen, der FC braucht a Geld. Mir sottat do zwoi Milliona schenka (das war jetzt des gleiche Späßle wie vorher…. Kapiert?)
Ond dann sait er glei drnoach: Ma hätt in der Stadtkasse zufällig 2 Milliona gfunda, dia kennt ma doch dem FC geaba wega dr Finanznot!
Wenns guat goht: losst er dann abstemma – wenn id, dann sait er a dritts mol: Liebe Kolleginnen ond Kollegen; die gfundene 2 Milliona kennt ma doch fiar da Sport verwenda z. B. fiar da FC! Was moinet dr???
Ond dann derfat endlich dia Stadträt froga! Wenn jetzt oiner saudomm frogat, was sehr oft vorkommt, dann fangt dr kloi Jan wieder a:
Liebe Kolleginnen ond Kollega: Mir hand 2 Milliona übrig – dia schenkt mer em FC!
Wer isch drfiar?
Ond so goht des da ganza Obend em kroisrom. Emmer drei oder vier mol! Be gspannt wia oft er ui nochher an schena Fischerdag wünscht!!!
Hand`ers kapiert oder soll i nohmol…??
Also! Drum isch besser, i verzell des, was verzellt wera muaß! Also horched noh her:
- Haushalt!
In Memminga hott ma zwenig Einnahmen. Eine erschde OB:-Verordnung isch, dass man die Parkeinnahmen vrdopplat. Des goht ganz oifach, indem dass ma die Parkplätz oifach halbiert. Dann miaßat die große SUV Fahrer emmer glei zwoi Plätz zahla! Gilt ab sofort!
- Schwimmwerk
Noch der genialen Idee, des nuie Freibad alz „Schwimmwerk“ zu benennen möchte er au Vorschläg für des nuie Krankahaus. Es isch ja auch a kommunales Unternehmen: allerdings hott er dia beschte Vorschläg scho fiar sich reserviert: Er isch sich noid ganz sicher, ob es „Schneidwerk“ oder besser „Nähwerk“ hoißen soll! Seine id ganz so guate Vorschläg wäret au: „Hygiene-Werk“ oder „Flick-Werk“, - Wer noh a bessere Idee hott, ka bis morga Obend dia Vorschläg glei bei ehm dohoi vorbei brenga. Es gäb au a Gläsle Apfelsaft zur Belohnung!!
- Wertstoffcontainer
Faschd jeden Dag trifft man schwer traumatisierte Bürger/innen vor dene Container. Verzweiflat wird der Alt-Metall-Container gsuacht! Dia send alle futt! Viele fahret tief traurig wieder hoim! Ond nemmat da ganza Metall-Gruschd wieder mit.
Der KI sait: Ma derf jetzt Blaschdig ond Metall in oin Kibel werfa! Es stoht auch im Kleingedruckten auf de Container. Brauchat also nomma blära! Brilla mitnemma; es stoht wirklich drauf!
- Wolfsichtungen im Unterallgäu
Wega dem bösen Wolf im Unterallgäu empfiehlt der KI dia kranke Verwandtschaft z. B. dia Großmuader derzeit nicht zu besuchen. Insbesondere sott ma auf koin Fall mit Kucha ond Rotwein durch da städtischa Forschd laufa. Id, dass oim so goht wia seinerzeit dem Memminger Rotkäppchen.
(Reschersche von mir: des Rotkäppchen war wohl der alter erschde Memminger SPD Oberbürgermoischter und isch vom bösen Wolf komplett verspeist wora!!!!)
- Und letztes….Hurrenstraße
Noch dem Schpatenstich vor genau 500 Joahr durch die Baura aus der Kramerzunft isch dia Stroaß jetzt in 500jähriger Rekordbauzeit fix und fertig! Der KI hot se neulich zua seim 75ten Geburtstag eröffnet ond gemeinsam mit Thorsten Burgbergbier a 125 m lange Forelle beim Festakt verspeist….
….Ah, na, des war jetzt alz a Schmarrn. Hauptmann, des muasch mer nohmal erklära….Mit dene viele Jubiläen huir kommt ma ja ganz durchanand. I kapiers nomma: odr schwimmed jetzt 125 Tausend vegane Blaschdig Fisch em Bach!? I woiß es oifach nomma…..
..außerdem roichts mit meim Gschwätz!! Mehr hott dr KI mir au id ausgricht, was I saga soll.
Abschließend möchte i mi deshalb ganz herzlich bedanka! Zuerst, wia emmer, bei mir selber! Und selbstverständlich bei ui alle, dass er mer so lang zughorchat hand!
An schena Jubiläums Fischertag wünsch I!
Uir Büttel!
